Zinaida Ust’ugova: ”Helpompi on eloš, konša laulat”

Zinaida Ust’ugovua mustetah karjalazien eeppizien pajoloin pajattajannu da karjalazien kul’tuuran kaiččijannu. 0+ Kuva on otettu Zinaida Ust’ugovan VK-sivulpäi.

Periodika-julguamon Ystävyskoin seinis 21. tuhukuudu pietäh mustoildu, kudai roih omistettu karjalazen runonpajattajan Zinaida Ust’ugovan mustole. Piduo ”Helpompi on eloš, konša laulat” valmistetah Karjalazien X kerähmön vallittuloin nevvosto, Karl Raution nimelline Petroskoin muuzikkuopisto da Karjalan kul’tuurine koodu -liitto.

— Mustoillan piendy on Karjalazien X kerähmön vallittuloin nevvoston kehoitus. Zinaida Jevlampijevna oli meile tärgei ristikanzu, ku hänes ymbäri kiehui ruado karjalan kielen da kul’tuuran hyväkse. Häi keräili folklouruainehistuo, opasti lapsii, pajatti Sohjanankosken Sateenkaari-joukos. Häi oli sidä mieldy, ku on ylen tärgei kerätä meijän kallehukset da andua net ielleh, tulieloile polvile, sanoi Oma Mediale Petroskoin muuzikkuopiston piälikön sijahine Ol’ga Vlasova.

Mustoillas suau nähtä da kuulta Kižin muzein folklourujoukon, Radis Gainijatovan da toizien artistoin ezityksii.

Zinaida Jevlampijevna Ust’ugova rodivui Louhen piirin Niiskan kyläh, pajatti karjalazii runoloi da pajoloi eri kielil, kirjutti karjalankielizii pajoloi paikallizis eläjis, opasti lapsii folklourujoukos ”Lintuset”. Hänen pajoneruo sai kuulta da nähtä eri festivualilois da kilvois.

Runoloinpajattai Zinaida Ust’ugova siirdyi toizele ilmale vuvvennu 2024. ”Kalevalan” painamizen 180-vuozipäiväle omistetus da Karjalas pietys eeppizien pajoloin pajattajien kilvas Zinaida Ust’ugova oli sanottu parahien pajattajien joukos da sai erillizen diploman ”Perindölöin säilyttämizes”.