Zinaida Strogal’ščikovan jubilejaks: “Siloi mö uskoim sihe, midä tegim”
Tämbei tetabale Karjalas etnografale, vepsläižele aktivistale Zinaida Strogal’ščikovale täudub 75 vot.
Zinaida Ivanovna Strogal’ščikova om sündunu Vologdan agjan Särjärves. Laps’aigas hän pagiži vaiše vepsäks. Venän kel’he hän openzihe, konz kanz sirdihe elämaha Ignatovskoje-külähä, kus vepsläižidenke ahthiš kosketusiš oliba venänikad-ki.
Jo norudespäi Zinaidal oli melentartuz’ vepsläižihe, heiden kul’turaha da kel’he. Hän openzihe Leningradan universitetan istorian fakul’tetan etnografijan kafedral, a sid’ lopi aspiranturan Moskvan Etnografijan institutas. Opendusen jäl’ghe hän tuli Petroskoihe i om radanu Karjalan Kelen, literaturan da istorijan institutas jo 50 vot.
Kaikuččen ičeze elon Zinaida Ivanovna omišti vepsläižile. Hän om oppinu vepsän rahvast da om tehnu äjan sen rahvahan hüvüdeks.
— Miše sabustada midä-se, tarbiž uskta sihe, midä teged. Siloi mö uskoim sihe, midä tegim. Meil oliba aktivistad, mö rižoim kaikenlašt tuged, jagase Zinaida Ivanovna johtutesil Vepsän kul’tursebran sädamižes da vepsän kelen udessündutamižen voziš.
Läz 30 vot Zinaida Ivanovna oli Vepsän kul’tursebran pämehen. Hänen iniciativan taguiči om tehtud lujas äjan. Nel’l’ vot tagaze Venäman prezidentan käskon mödhe Zinaida Ivanovnad pauklahjoitihe II stepinin medalil “Kodiman sabustusiš” sures panendas tedon kehitoitusehe da hüväs äivoččes rados.
