Ystävyskois sanellah suvikarjalazien kul’tuurah nähte
Karjalazien X kerähmön vallittuloin nevvosto Monikanzalline Karjal -projektan hantuzis kuččuu 16. sulakuudu Ystävyskodih kaikkii, kenen mieldy kiinnittäy karjalazien kul’tuuru.
— Huondespuoles Mielevy huondesvero -pivos Natalja da Jevgenii Mihailovat ruvetah sanelemah karjalazien muuzikkuperindös, soittimis da pajatandas. Huondesverole tulluot suajah oppie kandelehen soitandua. Ku pivon nimekse on otettu huondesvero-sana, ga tiettäväine taritačemmo karjalazien perindöllizii pastoksii da magieloi čuajun kel. Huondespidoh rahvas on kučuttu edukädeh, heijän keskes on meijän kul’tuurah syvendynnyzii da niidy, ket toinah enzi kerdua kuultah karjalazien perindölöis da tavois, sanoi Oma Mediale Valentina Mironova.
Illal, 16.00 čuasun aigah karjalazien kul’tuuran aihe suau jatkuo. Ildukečois suau nähtä kuulužan petroskoilazen Skylark-folkjoukon ezitys, kuulta karjalankielisty räppie Ondrei Gorškovas da suurel joukol pajattua karjalakse karaoke.
Karjalazeh ildukečoih vuotetah Karjalan tazavallan rahvahien Ystävyskodih (Periodika-julguamo,Titovan piha, 3).
