Keviäl 2020 Karjalan Rahvahan Liitto pani rattahile oman uvven Puhuo yhteh hiileh -projektan, kuduan hantuzis kaikkien muuloin pidoloin ližäkse kezän allus piettih Aivokyly-kilbu. Sih yhtyi läs 30 hengie. Kilbu tuli mieldy myö rahvahal, sendäh liittolazet pietäh se uvvessah.
Kilbah voibi yhtyö kolmen päivän aigua. Se algavuu 16. ligakuudu 15.00 aigua da loppevuu 18. ligakuudu 24.00 aigua. Kilbua vaste Karjalan Rahvahan Liiton da Oma Mua -lehten Vkontakte sivuloile pannah viiteh, kuduan kauti piäzet vastuamah kyzymyksih.
Kilvan siännöt ei olla jygiet, enzimäi pidäy registriiruijakseh resursah, sit mennä viittehen kauti da vastata kyzymyksih. Ole tarku! Registratsies pane oma nimi da sugunimi, ku arvostelijat voidas jällespäi kaččuo da arvostella sinun vastavukset. Mennyt kerdua erähät huijustelijat kilbuniekat ei kirjutettu omua tävvellisty nimie. Pahakse mielekse nimettömät ozanottajat eigo ni arvostettu, nigo palkittu.
Ku aigu kyzymyksien vastavuksih on miärätty, kyzymyksih pidäy vastata ruttoh. Täl kerdua roih annettu enämbi aigua ajattelemizeh. Kilvan voittajat suajah lahjat.