Vuotena 2026 Petroskoissa jatkuu katukäytävien luaja korjauš
Kulkijan Petroskoi -ohjelma starttasi vuotena 2025. Šen rajoissa šuoritetah katukäytävien luajua korjaušta. Ohjelman anšijošta on jo uuvvissettu yli 17 000 nelijökilometrie katukäytävie Petroskoin 16 kavulla. Vuotena 2026 ohjelma jatkuu. Šiitä ilmottau Karjalan tašavallan piämiehen lehistöpalvelu.
— Ohjelma keštäy muutoman vuuvven. Vuotena 2026 še jatkuu. Viime vuuvven lopušša Inna Kolihmatova korošti, jotta šen toteuttamisen toiseh vuoteh annettih yli 50 miljonie rupl’ua. Luvettelo objektiloista muuvvoštuu, kerrotah tiijotukšešša.
Vuotena 2026 tašavallan Tierahaštošta šuunnitellah antua Petroskoin kaupunkipiirillä 242 miljonin rupl’an rahotuš. Ne varat työnnetäh kaupunkin piha- ta tieverkon ylläpitoh, muun muašša katukäytävien kunnoštamiseh opaššušlaitokšien lähellä.
— Šamoin vuotena 2026 šuunnitelmissa on korjauštyöt Universitetskaja- ta Lesnaja- ta Čapajevin katujen tienristevyöššä, uuvvistamini tien ošalla Aleksandr Nevskin valtakatuo myöten ristevyöštä Maršalkka Meretskovin kavun kera Komsomol’skii-valtakatuh šuaten.
Aihiešta voit lukie niise šuomekši.
Yhty Oman Median Telegram-kanalah!
