Vuonnisen časoun’a täytti 10 vuotta
Pyhien muokatettujen Makkovei-veikkojen časoun’an kellojen šoitanta jo kymmenen vuotta ilmottau kyläläisillä šuurista pruasniekoista. Elokuušša on kylän piäpruasniekka Makkovei-veikkojen muisson päivä. Šamana päivänä vietetäh mesi- ta marjaspuassuo, šentäh pruasniekan nimi on “Marja-Makovei”.
Jyrkkilän termä -kylänošašša ennein-muinoin šeiso Pyhän Il’l’an časoun’a. Šen valokuvan otti šuomelaini valokuvuaja Into Konrad Inha vuotena 1894. Monien vuosien piäštä tämä valokuva autto uuvven časoun’an entistämiseššä.
— Časoun’a rakennettih koko muailman voimin. Karjalan arhitektori Sergei Kulikov keräsi kaikkie mahollisie istorijallisie tietoja, valmisti tulijan časoun’an tarkkoja eskiisijä. Časoun’an šalvoš šalvettih Puanajärveššä, Kalevalan yrittäjä Andrei Timonen autto šiirtyä še Vuonniseh, missä paikallisien kirvešmiehien joukko nošti časoun’an, kerrottih pruasniekan vetäjät.
Vuuvven 2013 14. elokuuta časoun’a oli juhlallisešti annettu kylän omaisuoh, šamana päivänä še oli pyhitetty Pyhien muokatettujen Makkovei-veikkojen kunnivokši.
Časoun’an 10-vuosijuhlakši valmissettih pieni kirja, missä on valokuvie ta kertomukšie kylän časoun’an rakentamisen ta kirikköväjen istorijašta. Kirja valmissettih Petrin ta Puavilan kirikköväjen avulla, Jevgenii-tuatto anto niitä lahjakši kylän eläjilla ta vierahilla, kumpaset tultih pruasniekkah.
