Vuokkiniemen kylä täyttäy 405 vuottu
Verokirjois enzimästy kerdua vuvvennu 1620 mainittu karjalaine Vuokkiniemi täyttäy 405 vuottu. Kyläpruazniekku, Il’l’anpäivy, on omistettu suurele merkipäiväle.
Tavan mugah Vuokkiniemeh 2. elokuudu pruazniekkah kerävyy omua rahvastu, toizis kohtis eläjiä kylälästy da gostih tulluttu. Piduo valmistetah Kostamuksen Sreda-kul’tuurukehityksenkeskus da Vuokkiniemen Kylätaloi. Pruazniekan aigah suau kuulta vuokkiniemeläzen ”Katajan” da petroskoilazen Oma Pajo -horan pajatandua, sego nähtä kostamukselazii ”Otrada”, ”Tuulitar” da ”Hete”. Perindöllizesti pruazniekkuprogrammu pietäh kahtel kielel – ven’akse da vienakse.
— Merkivuottu vaste piimmö suurdu ruaduo, keräimmö da kirjutimmo Vuokkiniemen aigukirjan. Myö kolmei — Valentina Dmitrijeva, Lilija Veselova da Nadežda Vasara keräimmö al’boumah kyliä koskujua ainehistuo vuvves 1620 täh päiväh suate. Lilijan tytär Tatjana käil kai net kirjutti. On olemas aigukirjan sähköversiigii, kuduan perustehel vähästy myöhembä luajitah suuret stendat da azetetah net kyläh, kerdoi Oma Mediale Valentina Dmitrijeva.
Kyläs 1. elokuudu pietäh Kostamuksen ”Katajan” da Petroskoin ”Oman Pajon” vastavus paikallizien eläjien kel. Tossu piän Pyhän Il’l’an pruazniekku alagvuu kirikkösluužbas, Tuatto meijän taivahalline -malittu lugietah karjalakse.
Kyläpruazniekas jogahine löydäy midägi ilokse ičele: ruvetah kižuamah kriukkah, Pakajamma karjalakši -kentäl opastutah vienah da korrondetah kielineroloi, Herkullini piha -kentäl opitah perindöllizii syömizii, luajitah kuvua ”valokuvanurkas”. Pietäh Paraš kukkakimppu -kilbu, valmistetah ruadopajat da neroniekoin jarmanku.
— Juuri pruazniekkupiän kyläh tullah EtnoPRO-pidoh yhtynyöt nuoret, sidä valmistetah Kanzallizen da alovehellizen poliitiekan ministerstvu da Ystävystaloi, jatkau Valentina Dmitrijeva.
Tavan mugah pruazniekas omii tavaroi rubieu myömäh Kala- ja marjapojat -laitos. Sego Kostamuksen ajolaitos andau kaksi avtoubussua, kudamil rahvas voijah tulla pruazniekkah da kiändyö kodih.
Aihies voit lugie suomeksegi.
