Vologdan agjan vepsläižil zavodihe «Elokaz purd»-festival’
Jo seičemendel kerdal Vologdan agjan Babajevon rajonan vepsläižed tegeba keskškoližen entokul’turižen festivalin, miččen nimi om “Elokaz purd”. Babajevon rajonan školad vaumičiba melentartuižed ezitusid, pajoid, karguid da teatrozutusid. Täl kerdal festival’ om toižes formas. Ühtnikoile pidab tehta video i oigeta se festivalin tegijoile.
— Kaik videoezitused pidab tehta vepsän kelel. Žürijoukus oma opendajad da kul’turan radnikad, kudambad arvosteleba ühtnikoid erazvuiččiš nominacijoiš. Ozutesikš, ”Vepsläižed pajod” vai ”Rahvahaline karg”. Lopus kaik ühtnikad saba muštlahjad da diplomad, sanub Ol’ga Balaban, “Elokaz purd”-festivalin tegii da žürijoukun ühtnik.
Festivalihe voiba ühteta Babajevon rajoinan školiden 7-17-voččed openikad da lapsiden sädaisebrad. Sen pätegend om kaita vepsän rahvahan kul’turad, libutada norišton da lapsiden hengiš armastust rahvahaze da kodikel’he.
«Elokaz purd»-festivalin tegijad oma Babajevon rajonan administracii da Kujan školan radnikad. Se om tehtud Prezidentan fondan grantoiden da Babajevon rajonan Vepsän kul’tursebran abul.
