Voimakkahimmat kyykkä-peluajat ollah Tverin alovehelta

Naisien kešen voittajakši piäsi Inna Beluzina Ostaškovista. Kuva: Uljana Tikkanen

Karjalan avonaisien kyykkä-kilpailujen henkilökohtaset kilpailut loputtih. Tavallisešti perintehellini talviturnauš pietäh Petroskoissa, ka tänä vuotena kilpailupaikakši valittih Kontupohja.

— Henkilökohtasih kilpaiuih ošallistu 20 naista ta 28 mieštä. Jotta ottua vaštah niin äijän peluajie piti järještyä nellä kenttyä. Petroskoissa še oli mahotonta, a tiälä myö šaima urheilukoululta luvan stadionin käyttämiseh, a paperitehaš puhašti šen lumešta, šano yksi kilpailun järještäjistä, Kontupohjan kyykkä-pelin kehittäjä Danil Brovin.

Naisien ta miehien kešen voimakkahimmiksi tultih kyykkä-peluajat Tverin alovehelta Ostaškov-kaupunkista. Šielä kyykkyä harraššetah ammatillisešti. Gorodki-pelin valmentajat pietäh harjotteluja kyykkä-peluajillaki.

Naisien kešen enšimmäisellä paikalla on Inna Beluzina (Ostaškov), toisella paikalla Natalja Petrova (Petroskoi), kolmannella — Svetlana Hadžijeva (Ostaškov).

Miehien kešen voitti Jurii Krotov (Ostaškov), toisekši piäsi Aleksandr Koškin (Ostaškov) ta kolmannekši — Igor Lisitsin (Sortavala).

Šamoin kilpailun enšimmäisenä päivänä piettih naisparien kilpailut.

Niissä voitti TarVoi-joukko (Žanna Tikkanen, Marina Lesonen, Kalevala), toisella paikalla Ryški-Puški-joukko (Inna Beluzina, Svetlana Hadžijeva, Ostaškov) ta kolmannella — Natali-joukko (Natalja Petrova, Petroskoi, Natalja Žulai (Vieljärvi).

Mi kyykkä-joukko on voimakkahin šelvitetäh tänäpiänä kilpailujen toisena päivänä.