“Voden kirj — 2025”: konkurs zavodihe kirjozutelusel
“Karjalan voden kirj” -konkurs om zavodinus udel ozutelusel, mitte avaitihe Karjalan rahvahaližes kirjištos. Ezile pandud kirjad om lähttud eloho vodel 2025, i voden aigan ned ližatihe kirjišton varažomha. Kaiked ozutelusel om 203 painust, miččiden keskes oma ani erazvuiččed kirjad: čomaliteratur, tedo- i openduzkirjad, karjalaižiden kirjutajiden kirjad, vepsän- i karjalankeližed kirjad, a mugažo runotuz da kirjad lapsiden täht.
53 kirjad ühtneb “Karjalan voden kirj” -konkursaha. Ned oli valitud iče paindištoil.
Muloi Petroskoin “Periodika”-painištos oli pästtud eloho 17 painust, miččiden keskes oli kut uzid, muga i udes paindud kirjoid.
— Kaikutte kirj, mitte paindas “Periodikas”, om pit’kän matkan da ičeze radho armastusen satuz. Täl vodel meiden painišton kirjad ühtneba konkursaha kudes nominacijas: “Kirjan taideh”, “Čoma kirj”, “Tedon lämoi”, “Karelia=Karjala”, “Minun kodiröun da sen eläjad” i “Lugeda da lugeda udes”, sanui “Oma Media” -portalale “Periodika”-painišton kirjerišton pämez’ Tatjana Tiškova.
Ozuteluz radab voden 2026 keväz’kun 22. päivähasai. Sen aigan sudijad tundištase vodel 2025 paindud kirjoidenke.
Kaik tahtnikad voiba tundištadas painusidenke da änestada parahimad kirjad Rahvahaližen kirjišton oficialižel lehtpolel. Änestamine jatkub sulakun 20. päivähasai.
Voden kirjaks valitas se, mitte sab kaikid enamb pauklahjoid erazvuiččiš nominacijoiš. Konkursan vägestajad nimetadas Rahvahaližes kirjištos 23. sulakud.
Uzištoid neciš temas voib lugeda mugažo karjalaks da suomeks.
Tarkištele “Oma Median” Telegram-kanalad!
