Voden 2026 augotišespäi läz 5 tuhad Karjalan eläjad oli dispanserizacijal
Vilukun 1. päiväspäi dispanserizacijal (terhvuz’tarkištamižel) oli läz 5 tuhad Karjalan eläjad, kudambišpäi läz 400 ristitud tarkišti ičeze ližadamižen sisteman. Nelläl mehel oli löutud onkologižed läžundad. Siš tedotadas “Respublika”-portalal, kus znamoitihe Karjalan tervhuden kaičendan ministran Mihail Ohlopkovan Telegram-kanalad.
— Dispanserizacijan satusiden mödhe täl vodel 12 ristitul oli ezmäižen kerdan löutud verenpörundan sisteman läžundad, 18 — ližadamižen sisteman läžundad (heišpäi kahtel löutihe plodutomuz’) da ühtel — saharkibu, a 323 ristitul voiba kehitoitta pit’kaigaižed kibud, kirjutadas tedotuses.
Päzuda dispanserizacijale voib kut tervhuz’organizacijoiš, muga i ühtes Petroskoin möndkeskuses. “Lotos Plaza” -mönd-ilotuzkeskuses jatktab ičeze radod “Tervhuden taho” -sija (“Territorija zdorovja”). 4. uhokud sigä voib päzuda läbi ezmäižes tervhuz’tarkištamižen etapas ilma aigkirjuteseta. 15:00 časuišpäi 18:00 časuihesai “Tervhuden tahol” radaba Petroskoin poliklinikan №1 lekarid. Kaikuččel tahtnikal linneb voimuz tehta erazvuiččed hibjan märičendad (niiden lugus oma kazvon i jügun märičendad), tedištada ičeze painusen sil’män südäimes, päzuda terapevtan vasthaotandale, a mugažo tehta erazvuiččiden rauhoiden ul’traänen tarkištamižen. Siš, kut tariž vaumištadas mugoižikš tarkištamižikš, voib lugeda poliklinikan Internet-lehtpolel vai küzuda telefonal: 8-963-745-66-59.
Miše päzuda läbi dispanserizacijas, tariž otta kerdale pasport da kaičuzpolis.
Johtutam, miše Karjalas jatktase “Terveh lidn” -akcii. Se abutab ristituile, kubambad eläba valdkundan edahaižiš peniš lidnoiš da küliš.
Uzišt neciš temas voib lugeda mugažo suomeks.
Tarkištele "Oma Median" Telegram-kanalad!
