Kut om jo tetpas täl vodel Karjalan valdkundan päiv pidetas Änižröunas. Karjalan pämez’ tugezi necen pätusen. Praznikazjtegod mäneškaba vepsläižiš-ki küliš.
— Karjalan valdkundan päivän päazjtegoid pidetas Derev’annoje-küläs. Mugažo praznikazjtegod mäneškaba Šoutjärves, kus adivoid tundištadas vepsän rahvanan kul’turanke da tradicijoidenke. Praznikad ”Kalarand”, ”Elonpu”, ”Pühä päiväine” pidetas vepsläižiš küliš siloi, konz ned tehtas tobjimalaz, sanub Karjalan Rahvahaližen da regionaližen politikan ministerstvan igähižiden rahvahiden erišton varapämez’ Jevgenia Šustova.
Karjalan valdkundan päivän praznuičendaha om anttud 50 millionad rubl’ad. Änižröunan administracijal om jo tehtud azjtegoiden plan.
Kalagen kul’turpertin kohenduz om üks’ niiš azjoišpäi, miččele anttihe rahad. Sigä kohetas katuz i tehtas kohenduz kul’turpertin sudäimes.
Mugažo 8.-10. kezakud Petroskoiš da Šoutjärves pidetas sur’ Regionankeskeine konferencii, mitte mülüb kut Vepsän kul’tur voden, muga Karjalan valdkundan päivän azjtegoiden planha.