Vodehesai 2030 Karjalas puhtastadas joged
10. sulakud Petroskoin lidnan ümbruzkundan Administracijas mäni Ekologižen nevondišton seičemenz’ištund Karjalan Valdkundan Valdmehišton ohjandusel, tedištadas Karjalan londusen varoiden da ekologijan ministerstvan press-službas.
Üks’ temoišpäi oli regionan veziuitoiden puhtastuz “Venäman vezi” -federaližen projektan aigan. Nece mülüb “Hüväd ekologižed olod” -valdkundaližen projektan azjtegoiden luguhu. “Venäman vezi” -projektaha mülüb Neglinka-, Lososinka-, Šuja-, Č’ornaja- da Kem’-jogiden puhtastuz.
— Meiden täht om ani tärged se, miše Pudožan rajonan Č’ornaja-jogi putui projektan veziuitoiden lugetišhe. Mö jatktam kehitoitta JUNESKO-objektad — “Änižen petroglifad” -arheologišt kompleksad. Č’ornaja-jogi mülüb tärktaha vezimatkaha, miččen lopus oma petroglifad, sikš om hüvä, miše jogi puhtastadas uden federaližen projektan aigan, sanui Karjalan Pämez’ Artur Parfenčikov.
Mugažo nevondišton ištundal pagištihe, kut Karjalas voib tehta nügüdläižen ciklekonomikan.
— Ištundal oli tehtud tärged pätuz: nügüd’ laukad da radištod ei sagoi čuta sömjändusid ühthižele rujosijoile. Nece pätuz tegeb muga, miše sömjändused da toine rujo ei segoidaižihe, ika ei voi kehitoitta jändusiden sortiruindad, sanui Artur Parfenčikov.
— Om planoiš tehta Karjalan ciklekonomikan. Nece om “Hüväd ekologižed olod” -valdkundaližen projektan pala, siš pagiži Venäman Prezident Vladimir Putin. <...> Planuičem rata ühtes susedregionoidenke, miše sauda logistikan da löuta “vihandoid organizacijoid”, miččed oma vaumhed rata jändusidenke da sortiruida rujod, sanui nevondišton da Venäman ekologižen sebran pämez’ Rašid Ismailov.
Uzišt neciš temas voib lugeda mugažo suomeks.
Tarkištele "Oma Median" MAX-kanalad!
