Vihm ei telustand kerata äi adivoid ”Elonpu”-praznikal
Tradicionaline vepsläine praznik ”Elonpu” mäni Šoutjärves. Se kerazi külän eläjid da adivoid jo 36. kerdan. Praznikale tuli äi karg- da pagokollektivoid Petroskoišpäi, radoi mastariden jarmark, miččehe ühtniba sijaližed-ki mastarid. Melentartuine programm oli tehtud lapsiden täht.
— Om hivä, mise praznikale tuldaze äi erazvuiččid kollektivoid, joga voden keradaze äi rahvast, kudambile om mel’he vepsän kul’tur, tuldaze kanzad lapsideke. Miide muzei mugažo ühtni praznikaha, adivod tuleskeld’he kacmaha muzejad, ozutelusele, ”Kaičii”-sebran mastarid ühtniba järmarkaha, sanub Šoutjärven muzejan pämez’ Natalja Anhimova.
Vodespäi 2012 ”Elonpu”-praznikan aigan tehtas sportvoibuid. Necil kerdal pahan sän taguiči erasid sportroduid heittihe, no letelendmäčvändon da jaugmäčvändon ühtnikoile jumalansä da vihm ei telustanugoi.
