Vienan Karjalah nähte sanellah Ystävyskois
Karjalazien X kerähmön vallittuloin nevvosto Monikanzalline Karjal -projektan hantuzis kuččuu 9. sulakuudu Ystävyskodih kaikkii, kenen mieldy kiinnittäy Vienan Karjala.
— Huondespuoles Viisas pala -pivos taritačemmo karjalazien perindöllizii syömizii — pastoksii da magieloi. Paginale kučuimmo tutkijan Marija Kundoz’orovan, kudai sanelou pidoh tulluzile Karjalan pohjaispuolen runonpajattajis. Huondeksel pidoh rahvas on edukädeh kučuttu, tahtozimmo, ku heis syttys se vienanklarjalaine kyven da hyö ielleh ruvettas sanelemah sidä, midä meis kuultah. Vastavuksele vuotammo turistoin da nuorižon kel ruadajii, yliopiston opastajii da kirjaston ruadajii, Zakonoinhyväksyndykerähmön deputuattua da toizii herrastajii, sanoi Oma Mediale Julija Filippova.
Ildupuoles, 16.00 čuasun aigah pivon valmistajat ruvetah ozuttamah fil’mua Vienan Karjalan erinomazes luonnos da mustomerkilöis da sanelemah pohjaispuolen karjalazien hengellizes perindös. Pidoh tulluzile taritah kviz-kiža. Piäzy ildupuolizeh pidoh on välly, vuotetah kaikkii, kenen mieldy kiinnittäy Vienan Karjala.
