Vieljärves luajitah kinuo
Syvyskuul Vieljärveh jiävittih yksityizet žurnalistat-dokumentalistat Piiterispäi, kuduat kerätäh materjualua kinoprojektah nähte. Keskimäzenny dielonnu kinos roidieu se, kui rahvas luajitah ičele lehtie “Vieljärven ikkunat”. Se faktu muga kiinitti toimittajien huomivuo, ku hyö piätettih luadie ynnälline dokumentukino, kunne puututtas kyläläzet ristittyöt, heijän eländät dai olendat, ruandat, hiät da suavutukset.
Tämän sygyzyn pluanois on kuvata da luadie lyhyt tizer — se on kinon pieni palaine da työndiä se Moskovah Maksim Gor’koin kinostuudieh. Stuudii rubieu hommuamah varoi jo pitkän, enämbän čuassuu kestäjäh kinoh Ven’an kul’tuuruministerstvalpäi. Projektan hyväksyttyy žurnalistat tullah Vieljärveh pitkembih sjomkih da enämbän kerran jo vuvvel 2025.
Täl kerdua kuvuajat ruattih Vieljärvel da Kinnermäl. Paistih rahvahanke, kudamat ollah “Vieljärven ikkunoin” hahmoloinnu da kuduat iče kirjutetah lehteh, kačottih midä net rahvas ruatah, mil piädy eläitetah, midä ajatellah, mittumis kohtis eletäh. Kinon ohjuajan Aleksandra Lusnikovan sanoin mugah, on mieleh pagizuttua kylälästy rahvastu.
— Hyö ollah avvonazet, hyväntahtozet, ga samal huigienvaruajat. Ezmäi pahoi tullah kontaktah, a sjomkien lopus jo kai sanotah, sanou žurnalistu.
Valmis kino pannah internettah. Vobi olla nengagi, ku mito TV-kanualu ozuttau sen omas efiiras.
