Vieljärveläzet opastujat piirustettih komiksoi yhtes ”Kipinänke”
Kuvvenden, seiččemenden, kaheksanden da yheksänden kluasan opastujat piirustettih komiksoi tarittuloin tiemoin mugah. Vastavus piettih Vieljärves 21. ligakuudu.
”Kipinän” piätoimittai Jana Filimonkova ozutti žuarnualas vuvvennu 1989 da vereksembi painettuloi komiksoi, sellitti, kui niilöi luajitah, ozutti oman ičen luajittuloi komiksoi. Puolen čuasun aigah lapsil pidi keksie omat komiksat da juata kai ruavot tovellizes toimitukses rouno: joga joukos oli piätoimittai, toimittai, taidoilii da kiändäi. Jygiembi toizii oli kiändäjil: paha kielinero on muamankielen lyhendetyn opastusprogramman tulos. Puolet komiksois oli kirjutettu ven’akse, erähät maltettih käyttiä abuh annettuloi sananyhtymii.
― Karjalan da suomen kieldy meile opastutah enzimäzes yhtendehtostu kluassah suate, nedälis on yksi urokku. Suomen kieldy opastutah vaiku kuvvenden, kaheksanden, kymmenenden da yhtendentostu kluasan opastujat. Nygöi suomen kieldy ei valliteta opastettavakse, vallitah karjalua. Muamankieldy opastutah urokannu vaiku 5.—8. kluasois, dostalit — ližäurokannu. Kaheksandes kluasas suadu arvosana menöy attestuattah, jällespäi net, kel ei ole himuo opastuo kieldy, ei opastuta sidä putilleh, sanou Vieljärven školan karjalan da suomen kielen opastai Julija Jegorova.
Yhtelläh vaigevuksih kaččomattah Julija mielihyväl käyttäy omis urokois Kipinä-žurnualua, lapsetgi käytetäh sidä rakkahembal toizii materjualoi.
― On ylen äijäl miellytännyh veres karjalankieline noumeru. Opastusvuvven allus pagizimmo sen mugah kezäh nähte, leikkain Memo-kižan, se ylen mielužu on. Konzu žurnualas on leikattavua, minä leikkuan da pien ruokos, ku käyttiä sidä materjualua urokois, sanelou Julija Jegorova.
