Paraskovja Prokopjevnan omat da tuttavat kerävytäh Karjalan Kielen Kodih pominoimah da mustelemah händy. Koin ruadajan Natalja Antonovan sanoin mugah, varustutah pominoimah karjalazien tabah, kudamua vie pietäh karjalazis kylis nygöigi:
– Kagrukiiselinke da kalakurniekoinke. Huondekses kävväh kalmoil, sit syvväh pominoičendumurgin da jälles kahtutostu suatetah pominoittavan stolaspäi lähtemäh omil tiehyzil. Suatandoin jälles pietäh päivykečoi, kus ruvetah mustelemah Paraskovja Ivanovua, kuundelemah hänen iändy nauhoituksinnu, sanou Natalja Antonova.
Pidoh tulou ijäkkähii naizii Vieljärvel da Kolatsellälpäi, kunne Ivanova on rodivunnuh, kudamat vie mustetah Paraskovja Prokopjevnan.
Enne kuolendua Paraskovja Ivanova käski omile, ku hänen muah pannes pajatettas karjalazii pajoloi. Häi oli ylen rakas iče pajattamah da oli vessel ristikanzu. Mugai pominoičendupiän ruvetah mustoittamah vahnoi pajoloi da častuškoi.
Pido Karjalan Kielen Kois on avvoi. Kalmoile käyndy on 10.00 čuasun aigua, pominoičendustola – 11.30. Kučutah rokotettuloi. 6+