Vidl-küläs mäneb “Vepsläižed lapsed” -regionoidenkeskeine konkurs
Piterin agjan Vidl-küläs 19. redukud videnden kerdan mäneb “Vepsläižed lapsed” — vepsän kelen tundijoiden regionoidenkeskeine konkurs. Azjtego tehtas Vepsän fol’klorkeskuses, augotiž om 13:00 časud. Konkursaha ühtneba lapsiden fol’klorkollektivad Karjalaspäi, Piterin da Vologdan agjoišpäi. Ühtnikoiden igä om 5—18 vot.
— Kaiked konkursaha ühtneb kahesa kollektivad. Karjalaspäi om üks’ ühtnik —“Vesläžed”-ansambl’, Piterin agjaspäi om nel’l’ kollektivad, Vologdan agjaspäi — koume. Kaik ezitused linneba vepsän kelel, sanui “Oma Media” -portalale Anna Trifanova, Vepsän fol’klorkeskusen radnik.
Konkurs jagetas kahthe palaha. Ezmäižes palas, miččen nimi om “Vändoihe vätа — mel’t’ sada” kollektivoile tariž ozutada žüri-joukule ühten rahvahan vändon ičeze eländtahospäi. Toižeks palaks, “Čüdokaz bobaine” -nimenke, ühtnikad vaumištaba lühüden prezentacijan vanhas rahvahan bobaižes, prezentacijan voib tehta starinan, pajon vai teatrozutusen formatas. Planuitas, miše konkurs koskub koncertaha, miččen aigan žüri-jouk valičeb vägestajad.
“Vepsläižed lapsed” -konkurs tehtas kerdan kahtes vodes. Sen tegendad oma vepsän rahvahan kelen, tradicijoiden da veroiden kaičend, a mugažo norišton tundištoitand rahvahaližen kul’turan hengižiden kal’husidenke. Konkursan tegijad oma Vepsän fol’klorkeskuz, Piterin agjan sijaližen ičeohjandusen komitet da “Vepsarija”-organizacii.
