Viändöi on arbailuloin da pruazniekoin aigu. Sit algavuu vuvven uuzi puoliško. Mittumannu rodieu Viändöi, moizennugi vuvven toine puoliško. Viändöin aigua naimattomat neidizet piettih eri taboi da arvattih tuliedu aigua kylylöisgi. Karjalazet piettih kylyy erinomazennu paikannu. Korzan kyläs pitkin ojua on nostettu 17 kylyy, sendäh sidä pihua sanotah kylylöin pihakse.
– Meil himoitti, ku Korzas olis perindölline kezäpruazniekku. Vahnois kniigois myö lövvimmö tiedoloi, ku Korzas alalleh piettih iluo Viändöi aigua. Myö piätimmö elavuttua tämä perindö, sanoi Jessoilan etnokul’tuurizen keskuksen piälimäine Arina Ignat’kova.
Pruazniekkah kerdyi Korzan eläjii, duaččuniekkoi da gostii lähikylispäi. Kai räkkipäivännygi karjalazet kävväh kylyh, ga sen lämmittämizeh pidäy tuvva vetty, varustua hallot da vastat. Vastoi luajittih parahite Viändöin aigua –Iivananpäiväs Pedrunpäivässäh. Pruazniekan järjestäjät piettih kilbuloi kylynsuvaiččijoih niškoi da tiijustettih, kenbo rutombah valmistau kylyn. Pruazniekkah yhtyi paikallizii da toizis kylis tulluzii pajo- da tansijoukkoloi.
– Enne bes’odat piettih kylysgi, kolmes nellikkömetris maltettih tansie kahten puaroin, saneltih pruazniekan järjestäjät.
Folklourujoukot “Paivuzet”, “Garmonija”, “S’amozerje” da “Koivuine” da solopajattajat Nadežda Vasiljeva Jessoilaspäi da L’udmila Bočarnikova Suojärvespäi ozuteltih karjalan da ven’an kielel.
Konzu kai on valmis kylyh niškoi: vastat, hallot da viet on tuodu – karjalazet juvvah čuajuu. Kuni piettih konsertu, lavan tyves samvuarois jo kiehui vezi.
Pruazniekkah yhtynyöt kiitettih pivon järjestäjii da toivottih, ku kylylöin pihal piettäs pruazniekku tuliel vuongi.