Vesläžed-ryhmä esitti uuši kanšanmusiikin al’pomi
Lapšien folkloriyhtyveh “Vesläžed” esitti uuvven Maanitus-al’pomin. Šiih on nauhotettu 34 kanšanšoittimilla šoitettuo kappalehta.
Al’pomissa on kantelella, jouhikolla ta pillillä šoitettuo musiikkie. Lapšet iče šoitettih šitä nauhotettavakši Gandvik-iänityšstudijošša.
— Ennen nauhotušta lapšet noin puoli vuotta valmistauvuttih ta valmissukšen aikana tiijuššetih äijyä mukavua Armas Otto Väisäsen elämäštä ta tutkimušruavošta, tutuššuttih kanšanmusiikkih, parennettih šoittotaituo ta opaššuttih improvisoimah, mitä oli ominaista XX vuosišuan alun kanšanmusiikin šoittajilla, šano yhtyvehen johtaja Ol’ga Gabukova.
Al’pomin nauhotukšeh ošallistu yhekšän solistie ta šoittajien ryhmä. Maanitus-al’pomin esityš piettih Karjalan kanšallisešša musejošša. Kaččojie keräyty täyši šali: lapšien vanhemmat, yhtyvehen yštävie ta apulaisie, kumpaset korkiešti arvoššettih lapšien ta opaštajien yhtehistä ruatuo.
— Še on oikein arvokašta šekä Karjalašša jotta koko Venäjällä. Mie koko šytämeštä kiitän lapšien opaštajie ta vanhempie, jotta työ opaššatta ta kannatatta heitä täššä ruavošša, kumpasen piätulokšena on še, jotta heilä on ylpeyttä kantua arvokašta nimie — kantakanšan ainutluatuisen kulttuurin šäilyttäjä, korošti yhtyvehen neuvonantaja, kanšanmusiikin tutkija Galina Semakova.
Al’pomin esitykšeššä oli näytetty musiikkispektakli “Kuin Armas Otto Väisänen kanšanšoittajie ečči”. Lapšet tuttavuššettih kaččojie šiih, kuin Armas Otto kävi tutkimušmatoilla Karjalah, tanššittih pruasniekkatanššija, šoitettih ta laulettih.
Al’pomi oli nauhotettu Karjalan tašavallan 105-juhlavuotena. Šen valmissukšeh oli käytetty Irina Fedosovalla nimitetty stipendi, kumpasen yhtyvehellä myönti Karjalan kulttuuriministerijö vuotena 2023.
Yhty Oman Median Telegram-kanalah!
