Muikkufestivalie pietäh karjalaisešša kyläššä Vuokkiniemeššä toiseh kertah. Tänä vuotena šiih ošallisutah paikalliset Vuokkiniemen ta Koštamukšen kalaštajat. Festivalin avajaisešša šen järještäjät tervehittih kilpailun ošallistujie ta kylän vierahie, luvettih šamanien tietošanoja, lähetettih kalaštajie laškomah verkkoja. Avajaisien lopušša Tulikissat-joukko ilotetti pruasniekan kaččojie tuliesitykšellä.
- Meijän kalafestivalin erikoisena vierahana on Alla Mihejeva, näyttelijä ta TV-ohjelmien vetäjä. Hiän valmistau reportaasie festivalista. Tänäpiänä hiän läksi kalaštajien kera laškomah verkkoja ta šattu näin, jotta nämä kalaštajat ollah viime vuuvven kilpailun voittajat – kerto Vuokkiniemen kylätalo -etnokeškukšen johtaja Julia Filippova.
Tänäpiänä šiä ei ollun oikein hyvä kalaššukšella varoin. Päivällä oli lämmin ta päiväni paistoi. Šemmoni ilma ihmisellä on hyvä, ka kalalla ei. Festivalin järještäjät toivotah, jotta taikašanojen lukemini ta kalamiehien taito autetah šuaha riittäväšti kalua. Huomenna festivali jatkuu, huomenekšella kalaštajat noššetah verkot järveštä, kilpaillah ken šai enemmän kalua ta ken nopiemmin puhaštau šitä. Niise prusniekalla šuau maissella karjalaista ruokua.
Mujehfestivalie pietäh Vuokkiniemen kyläššä toiseh kertah. Viime vuotena še oikein mielty kyläläisillä ta kylän vierahilla, šentäh kyläššä toivotah, jotta pruasniekašta tulou jokavuotini tapahtuma. Vuokkiniemi on Ylä-Kuittijärven rannalla, tiälä on äijän kalamiehie ta kalaššušperinneh šäilyy.