Verez sügüz’kun nomer udeks openduzvodeks
“Periodikas” läksi eloho uz’ “Kipinä” -kulehtesen nomer vepsän kelel. Sügüz’kun nomeras om paindud uz’ material “Minun baban sarnoid” -ciklaspäi. Täl kerdal Mašoi-neičukaine löudab čudokahan sebranikan — vazaižen. Hän iče andab sille nimen, sötab da jotab sidä.
Mugažo kulehtesen lehtpolil jo lugijoile tetabad mecživatad jatktaba ičeze matkad Karjaladme. Necil kerdal hö läksiba Sundozero-järven randale. Neniden komiksoiden avtorad oma Anna Danilova da Sergei Svetov.
“Tedat-ik tö?” -rubrikas Darja Hil’ starinoičeb, mikš kaik ristitud nägeba unid i midä niidenke tehta.
— Täl vodel “Kuki-rikku”-videožurnal vägesti “Evrazian än’” -Ühthižvenälaižel festivalil. Projektan tegijad kaiken aigan oma meidenke ühtesrados. Lühüdaižed istorijad videožurnalaspäi oma ani mel’he meiden lugijoile, sikš udehe nomeraha panim erasid niišpäi vepsän kelel da tarkemba starinoičim “Kuki-rikku”-projektas, – sanui “Kipinä”-kulehtesen pätoimitai Jana Filimonkova.
Vereses sügüz’kun nomeras, kut kaiken-ki, lugijad löudaba urokoiden aigmäran, mastar’-klassan, runon, tekstad da harjoitusen eri-igäižiden lapsiden täht.
