Piterin agjan Rahvahan sädandradon pertin da Vepsän fol’kloran keskusen radnikad vaumičeba interaktivižen ozutelusen ”Mecan ižand”.
Projekt tehtas tulijal vodel. Ozuteluz azotadas ühthe Vepsän fol’kloran keskusen honusišpäi. Nügüd’ projektan sädajad jo meletaba koncepcijad, dizainad da ozutelusen kaludišton sijaduz. Virtualižen ozutelusen mecan ižand – mechine – om valitud ei muite. Se om vepsläižen mifologijan pähengišpäi.
— Honusehe pandas mecživatoiden figuroid. Honusen kaludišt linneb kandoiden da puiden pilitesiden vuitte. Ližaks, seinihe ripputadas meckuvid. Necil virtualižel mecal linneb ižand – tätüine-robot, mitte mahtab pagišta venäks da vepsäks, sanub Piterin agjan Vepsän fol’kloran keskusen radnik Ol’ga Spirkova.
Mecan ižand — mechine — starinoičeb ristituile siš, kut pidab oikti vedäda ičtaze mecas, midä pidab tehta, ku segoid mecha.
Ozutelusen tegijad sanuba, miše uz’ honuz linneb äifunkcionaližen, siš voib tehta erazvuiččid mastar’-klassoid, vedäda kel’kursid da toižid azjtegoid peniš gruppoiš.