Vepsläine “Jätan ičein jäl'gen”-fil’m sai jo toižen pauklahjan
Petroskoiš mäni jogavozne pressan praznikeht, miččel tehtihe lehtezmehiden, TV- da radioradnikoiden töiden ühthevedod. Ei jänd homaičuseta GTRK Karelian rahvahaližen toimišton fil’m-ki vepsän kelel.
Männuden voden redukus “Jätan ičein jäl'gen”-fil’m (18+) tegihe vägestajaks ”SeZaM-2021”- öbokan lehtez-, TV- da radioradnikoiden konkursal ”Hengenkosketai süžet. Parahim programm!”-nominacijas. Nügüd’ se lahjoitihe sijaližel konkursal pressan ehtpraznikal, mitte kaikuččel vodel mäneb Karjalan pälidnas. Täl vodel ei valitud ni üht töd ”Voden pagištotuz”-nominacijas, no viž töd sai specialižid lahjoid žurijoukuspäi. Niiden lugus om “Jätan ičein jäl'gen”-fil’m vepsän kelel.
— Fil’man päheng Sergei om harvinaine ristit. I necidä azjad kacui homaičeb da el'gendab. Sergei eläb üksnäze jättud vepsläižes küläs. Nece om lujas edahan lidnoišpäi da külišpäi, se om mecoiden keskes. Sergei ei unohta kodikel't, hot' pagišta ei ole kenenke. Hän ei jäta kodimad i tegeb radod, miččehe openzihe völ laps'aigas. Minä mel'düin neche mecnikaha i nademoi, miše fil'man kacujil sünduba erazvuiččid melid, sanub fil’man avtor Maria Šašina.
Šašina radab Karjalan televidenijal jo enamba 10 vot. Neniš voziš hän tegi äi fil’moid da teleozutesid vepsläižidenke.
