Vepsläižile anttas maksuta mapalad tradicijoiden kaičendan täht
Vepsän rahvahan ezitajile anttas oiktuz’ sada maksuta mapalad, miččed oma vepsläižiden tradicionaližiš eländtahoiš. Se tugedab vepsän rahvahan unikališt kul’turad, tradicionališt elonladud da elomištod.
— Oiktuden maksutomaha mapalaha voiba sada vepsläižed, kudambad kaiken aigan eläba ičeze rahvahan tradicionaližiš eländtahoiš: Šokšun, Šoutjärven vai Kalagen rajonoiš, sanui prezz-relizas Sergei Sedleckii, Karjalan elomišton da man kosketusiden ministr.
Mad anttas maksutomaha kävutoitandaha ei enamba, mi 10 voden aigaks. Päpakičusen om se, miše mad tariž kävutoitta vaiše tradicionaližiden salištandoiden da radonmahtoiden täht. Ned oma živatan- da mezjaižkazvatand, marad, taidehradonmahtod da toižed radod, miččiden lugetiž om vahvištadud Venäman valdmehištol.
Miše sada mapalan, tariž oigeta pakičuz da kaik tarbhaižed azjbumagad: pasport; todištuz siš, miše pakičii om vepsläine; azjbumag registracijas ühtes tradicionaližiš eländtahoišpäi. Mugažo voib ližata azjbumagoid, miččed ozutaba pakičijan tahtod kehitoitta vepsläižiden kul’turad vai tehta tradicionaližid radoid.
Pakičuz voib oigeta “Gosuslugi”-portalan abul, no vaiše ku manpala om oficialižes maregistras vai ku nece om planoiš. Mugažo pakičuz voib oigeta Äifunkcijaližes keskuses vai počtale (Karjalan elomišton da man kosketusiden ministerstvaha vai Petroskoin Mavaroiden ohjandusehe).
Pakičusiden ozutesed da tarkembad tedod voib löuta Mavaroiden ohjandusen internet-lehtpolel.
Jo vozil 2024–2025 oli tehtud nel’l’ makožmust. Ned koskiba mugoižid mapaloid, kus vepsläižed voiba kehitoitta ičeze tradicionaližid radmahtoid.
Uzišt neciš temas voib lugeda mugažo karjalaks.
Tarkištele "Oma Median" Telegram-kanalad!
