Vepsläižed: igähižele vähäluguižele rahvahale anttas uz’ tugi
Koncepcijan pätegendad oma vähäluguižiden rahvahiden ekonomine, socialine da kul’turine kehitoituz, tradicionaližiden elotahoiden kaičend, tradicionaližen elonladun, elomištradon da kul’turan tugi.
— Meletan, miše vaumištada azjtegoiden planad uden koncepcijan todenzoitusen täht pidab igähižiden vähäluguižiden rahvahiden regionaližile sebroile-ki kaikiš elotahoišpäi. Sen ližaks, kaik azjtegod pidab diskutiruida Igähižiden vähäluguižiden rahvahiden ezitajiden sijaližiden nevondištoidenke. Se sündutab sijaližil valdmehil melentartusen pätegendoiden todenzoituses. Tämbei rahoiden jagamine socialiž-ekonomižele tugele federaližes büdžetaspäi vepsläižiden täht om tehnus läz nelläd kerdad vähemb da ei ole voimust, kut ende, tehta surembid azjtegoid i projektoid. Sikš uden koncepcijan plan abutab meile kaikile necil jügedal aigal, sanui “Oma Mediale” “Vepsän kul’tursebran” pämez’ Larisa Čirkova.
Igähižiden vähäluguižiden rahvahiden ezitajile pidab ühtneda kundaližihe ištundoihe da ekologižihe ekspertizoihe.
Tradicionaline elomišt da radonmahtod tugetas mectuz- da kalateztahoiden andmižen abul päazjan ezmäi igähižiden vähäluguižiden rahvahiden täht.
Planuitas paremboitta mobil’nijad da internet-ühtenzoitust, tervhudenkaičendan ladud. Mugažo saudas nügüdläižed školad, osttas openduzkirjoid, kaludištod, nügüdläižid ladehid opendusen täht. Ližaks tugetas igähižiden vähäluguižiden rahvahiden kelid.
Pohjoižen, Sibirin da Edahaižen Päivnouzman igähižiden vähäluguižiden rahvahiden kehitoitusen koncepcijan mödhe pidab tugeta teatroid da rahvahaližid pajo - da kargsebroid, miččed kävutoitaba ičeze sädandrados igähižiden vähäluguižiden rahvahiden kelid. Paiči sidä, tugetas tedo-oppindoid, miččed koskeba nenid rahvahid.
Venäman valdkundmehišt käski Federališt rahvahiden azjoiden azjmehištod da sijaližid valdmehid kudes kus vaumištada azjtegoiden planad uden koncepcijan mödhe.
Uzištoid neciš temas voib lugeda mugažo karjalaks da venäks.
