Vepsläižed da nencad allekirutiba kožmusen ühthižrados
”Periodika”-paindištos mäni vastuz, miččele kerazihe Vepsän kul’tursebran ühtnikad, Karjalan Rahvahaližen da regionaližen politikan ministerstvan ezitajad da Zakonoiden tegemižen kundan ezitajad Jamalo-Neneckijan okrugaspäi. Vastusel pagištihe küzundoiš, miččed koskeba vähäluguižid rahvahid, rahvahiden kul’turiden da keliden kaičendas da kehitoitandas. Molembas polespäi starinoitihe valdmehišton tuges da jagetihe ičeze radon mahtištol.
Vastusen lopus allekirjutadihe kožmusen ühthižrados Vepsän kul’tursebran da Pohjoižen igähižiden vähäluguižiden rahvahiden ”Jamal - potomkam”-associacijan keskes.
—Karjalas mugažo eläba Pohjoižen igähižiden vähäluguižiden rahvahiden ezitajad – vepsläižed. Kut tuli sil’mnägubale, meil om äi ühthižid azjoid. Meiden kundaližile sebroile pidab jagadas mahtištol, abutada toine toižele da tugeta toine tošt, sanui Eduard Jaungadu, ”Jamal – potomkam”-associacijan prezident.
Adivoile Jamalo-Neneckijan okrugaspäi ”Periodikan”-radnikad starinoičiba Mediakeskusen da ”Oma media”-portalan rados. Mugažo adivod oleskeliba vepsän mal, heil oli čoma voimuz tundištadas vepsän rahvahan kul’turanke da tradicijoidenke.
