Vepsläižed aktivistad popul’arizoitaba vepsläšt kul’turad Petroskoiš

Vastusen adivod tegiba erazvuiččid küzundoid vepsläižen literaturan polhe. Kuva: Galina Baburova

“Periodika” -painištos vepsläižed aktivistad L’udmila Aleksejeva da Svetlana Pl’uhina starinoičiba Pacientan školan ühtnikoile Karjalan igähižes vähäluguižes rahvahas — vepsläižiš.

— Ei kaikutte Petroskoin eläi tedab, ked oma vepsläižed. Mö tahtoim starinoita ristituile meiden rahvahas da ozutada, kut kulub vepsän kel’. Pagižim vepsläižes runoilijas Alevtina Andrejevas, lugim hänen runoid, sanui L’udmila Aleksejeva.

Mugažo “Periodikan” radnikad starinoičiba painusiš, miččed lähteba eloho vepsän kelel da ozutiba vepsän rahvahaline sädo.

L’udmila Aleksejeva da Svetlana Pl’uhina oma “Vepsän kul’tursebran” ühtnikad, “Randaine” -anambl’an pajanikad. Äi vozid hö paneba ičeze vägid vepsän kul’turan kaičendaha.