“Vepsän kul’tursebr” tegi voden 2025 ühthevedod
19. tal’vkud mäni “Vepsän kul’tursebran” necen voden jäl’gmaine suim. Azjtegon ühtnikad tegiba organizacijan radon ühthevedod, a mugažo pagištihe valdkundaližes rahatuges, mitte om oigetud vepsläižiden kelen da kul’turan kaičendaha i tradicionaližiden eländtahoiden kehitoitusehe, tedotab Karjalan rahvahaližen da regionaližen politikan ministerstvan press-služb.
Karjalan Valdkund sab federaližen rahatugen, miččen pala oigetas vepsläižiden etnokul’turižehe da etnosocialižehe kehitoitusehe. Vodel 2025 sil rahatugel vedetihe tradicionaližed vepsläižed praznikad, jatksihe sauvondradod Šoutjärven etnoparkas. Vepsläižiden küliden školiš pidetihe azjtegoid, miččed oli omištadud neniden školiden 220-voččele jubilejale da Suren Kodiman voinan vepsläižile gerojile. Federaližel rahatugel vedetihe vepsän kelen kursad, paindihe Nina Zaicevan “Minun vepsläine oza” -kaks’keline povest’. Kaik ned projektad tehtas ühthižtös valdkundan vepsläižiden organizacijoidenke da kundoidenke.
— Vepsläižid tugetas ani hüvin. Vepsän kel’t voib opeta školiš da universitetas, Änižrandan vepsläižiš küliš aigvoččil om voimuz kävuda vepsän kelen kursile. Paindas kirjoid, pästtas eloho lehtez da kulehtesed, tele- i radioprogrammoid. Vepsän kel’t kävutoittas mediasferas, se om jo sidotud nügüdläižiden tehnologijoidenke, pidetas erazvuiččid etnokul’turižid azjtegiod, sanub “Vepsän kul’tursebran” pämez’ Larisa Čirkova.
Vodel 2025 “Vepsän kul’tursebr” tegi “Kul’tur da kel’: tämbei, homen, kaiken” -projektan, miččen azjtegoiden enambišt oli oigetud lapsile da norištole. Projektan päazjtegoiden lugetišhe putui “Vepsläine sarn” -Regionoidenkeskeine festival-konkurs, sihe ühtniba lapsiden kollektivad Karjalaspäi, Piterin da Vologdan agjoišpäi. Nece festival’ om lujas tärged: sen abul lapsed da norišt tundištase vepsän rahvahan kelenke da kul’turanke.
Voden 2025 sociologižen küzelusen mödhe, 88% Karjalan vepsläižid navedib azjtegoid, miččid tehtas federaližel rahatugel.
“Vepsän kul’tursebr” -organizacii zavodi ičeze radon vodel 1989. Se abutab pätta problemoid da kehitoittas vepsän rahvahale, mitte putub Venäman igähižiden vähäluguižiden rahvahiden lugetišhe.
Tarkištele "Oma Median" Telegram-kanalad!
