Vepsän kel’ kormanas: läksi eloho “SanuLugeKirjuta!”-kursan ližaduz
“Vepsän kul’tursebr” tedotab, miše om lähtnu eloho “SanuLugeKirjuta”-kel’trenaž’oran smartfonližaduz. Projekt, mitte oli todenzoittud Karjalan Pämehen grantoiden fondan rahoil da Rahvahaližen i regionaližen politikan ministerstvan ühthižrados, om tehnus völ lähembaks smartfonoiden kävutajile.
Sen ližadusen abul voib tehta kaik vepsän kelen kursan tegendad smartfonal. Uden ližadusen irdnägo kebnenzoitab opendust: kävutajad voiba jügedusita tehta harjoitused, kundelta audiokirjutesed, miše el’genda vepsän paginad paremba, da opeta uzid sanoid.
— Opetas voib kut kodiš, muga matkas-ki vai eskai seištes jonos — sen täht tariž vaiše avaita ližaduz. Nece om nügüd’aigaine da maksutoi abunik vepsän kelen opendamižes, starinoiči “Oma Media” -portalale Gleb Fomin, üks’ ližadusen kehitoitajišpäi.
“SanuLugeKirjuta!” om onlain-trenaž’or vepsän kelen ičeopendusen täht. Trenaž’or jagase koumehe palaha (jügeduden mödhe), kaikuččes miččišpäi om harjoitusid pätemoil (kirjamišt, pereh, londuz i m. e.). Se abutab kävutajale opeta enamba 2000 sanad da virkeht vändoiden da melentartuižiden harjoitusiden abul.
