”Virantanaz”-vepsläižen eposan Nina Zaiceva kirjuti vodel 2012. Nügüd’ se om kätud jo nelläha – estin, suomen, venän da francian – kel’he. Francian kelel sen nimi om ”Kondjan pajo”. Gijöm navedib poemoid da eposoid, opetes suomen kel’t hän lugi Kalevalad, sid’ tedišti ”Virantanaz”-eposas-ki.
— Eposoiš hüvib nägub rahvahan kul’tur da kel’. ”Virantanaz”-eposas om erasid mugoižid frazeologizmoid i kuvitelusid, miččid om jüged käta. Kaiken aigan, konz minai oli küzundoid, Nina Zaiceva abuteli minei, andli sihe vastusid. ”Virantanaz”-eposas rifman vajehtuz om lujas tärged. Kut sanub iče Nina Zaiceva, se sirdäb süžetad i tegeb eposad erilaižeks. Minai oli taht kaita necidä erigoičust, sanui Gijöm Žiber.
Abuti Gijömale kändmiženke hänen sebranik, kirjutai, runoilii, francijan, latinan i amuižgrekan kelen opendai Pjer Prezüme (Pierre Presumey).
— Paksus sanutas, miše runoiden kändmine om kaikid jügedamb. Se ei ole ani tozi. Miše sinä voižid ”mujada” tektsad, sinei tariž pordoks unohtada ”lähtkes”, miše toine kel’ vastaiži sidä ilomelel. Möhemba pördatoi sihe tagaze. Kändmine om matk. Meiden matk oli čoma da ”hüvämaguine”, siks ku Nina Zaiceval om südäimeline runo. Miše kaita tekstan ”väged”, valičim 7-,8-,10-tavuižid rivid, ližazi Pjer.
Kirjan tiraž om 1000 ekzempl’arad. Kuvid kirjan täht tegi estilaine taidehpirdai Jüri Mildeberg. Pigai Francias pidetas uden kirjan prezentacijoid.