Venäman painusen päiv mäni “Periodikas”
13. vilukud “Periodika”-painišton Karjalan Rahvahiden sebruden kodiš mäni praznikaline azjtego, mitte oli omištadud Venäman painusen päiväle. Sille kerazihe Karjalan joukvestišton ezitajad: tele- da radioradnikad, lehtesiden da kulehtesiden toimitajad.
Parahimid radnikoid ozateli da pauklahjoiči Karjalan Valdkundan pämez’ Artur Parfenčikov. Ičeze ozatelendas Artur Olegovič spasiboiči joukvestišton radnikoid heiden panendas Karjalan kul’turan da rahvahaližiden keliden kaičendaha i kehitoitandaha, toivoti kaikile satusid udes vodes.
Korged pauklahj — Karjalan arvostadud žurnalistan arvnimi — sai Julia Petunova, kudamb vodelpäi 2006 radab “GTRK Karjalan” televidenjas, vedäb programmoid suomen kelel. Pauklahjoid da kitändkirjeižid mugažo saiba “Periodika”-painišton radnikad: Jana Filimonkova da Margarita Jufa (“Kipinä” -lapsiden kulehtez), Galina Baburova (“Kipinä” -lapsiden kulehtez, “Kodima”-lehtez), Margarita Pehkonen (“Karjalan Sanomat” -lehtez, “Oma Media” -portal), Maria Remšujeva (“Oma Mua” -lehtez), Anna Sidorova (“Karjalan Sanomat” -lehtez).
— Keliden kehitoitand om sidotud lapsidenke da norištonke. Radan “Kipinä”-kulehteses vodelpäi 2013 i voin sanuda, miše nece kulehtez da “Kodima”-lehtez ei olgoi vaiše tedotajad, ned mugažo abutaba kaita kel’t. Se om ani tärged: mö kazvatam ut sugupol’ved da mel’dütoitam lapsid opendamha kodikel’t, sanui Galina Baburova.
— Olen ihastusiš sada necen pauklahjan meiden pämehelpäi. Om lujas tärged se, kut meiden radnikoiden satusid oli homaitud da lahjoitud Karjalan valdmehil. Ihastusenke jatktam tehta ičemoi radod, ližazi Jana Filimonkova.
Venäman painusen päiv oli tehtud oficialižeks praznikaks vodel 1991. Nece päiv om sidotud ezmäižen venälaižen “Vedomosti”-lehtesenke, mitte zavottihe painda vodel 1703 P’otr I käskön mödhe.
Uzišt neciš temas voib lugeda mugažo karjalaks.
Tarkištele "Oma Median" Telegram-kanalad!
