Venämal tehtas uz’ projekt blogeroiden-matknikoiden täht
Pakičused ottas niilpäi, ked tahtoiba ühtneda “Enamb, mi bloger” -projektaha, mitte mülüb Rosmolod’ožan “Enamb, mi matk” -programmaha. Siš tedotadas “Respublika”-portalal.
Ühtnemaha konkursaha kuctas ristitud, kudambad navediba matkata Venämadme da jagadas ičeze tundmusil toižidenke mehidenke socialižiš verkoiš. Ühtnikoile pidab tehta matkan polhe material, miččehe mülüba tekst, video da fotokuvid. Kaiken ližaks nece tariž tehta openduzmaterialaks kacujiden täht: sen abul pidab antta tedoid regionoiš, rahvahiš, tradicijoiš i m. e.
Om voimuz ühtneda kahtes formatas: ezmäi päzuda läbi online-openduses, miččen abul voib opetas tehta tarbhaižed materialad, vai muite oigeta ičeze radon kokursale. Online-opendusen aigan ühtnikad tedištaba, kut tehta videoid da fotokuvid, kirjutada tekstoid da rata kundlii- da kacuijoukunke internetas. Opendusen lopus ühtnikad saba sertifikatad da ližaballoid.
— Tahtnikoil om koume voimust ühtneda neche projektaha. Kaikuččen kerdan valitas 70 vägestajad, kaiked lahjoitas 210 mest. Parahimad radod mülüba elektronižehe katalogaha, a niiden avtorad saba lahjad, tedotadas “Respublika”-portalal.
Oigeta ičeze pakičused voib semendkun 31. päivähasai. Ühtneda konkursaha voiba 12-voččed da vanhembad ristitud, a mugažo Venämal eläbad mehed verhiš maišpäi.
Tarkištele "Oma Median" MAX-kanalad!
