Venämal planuitas opeta vähäluguižiden rahvahiden keliden kändajid
Venämal om zavodinus uz’ radmahtvaumičusen programm. Se om oigetud opendajile, kudambad radaba kodikelidenke, miččiden keskes om igähižiden vähäluguižiden rahvahiden kelid. Programman kursiden jäl’ghe opendajad voiba tartta kändajan radho, siš tedištadas “NacAkcent”-mediaprojektan lehtpolel.
Opetas voib online- da offline-formatoiš, opendusehe mülüb lekcijoid i praktikaližid urokoid, a mugažo kändmižen praktikad.
— Tariž vaumištada uzid kändajid, muite rahvahaline literatur koleb, muite em nägištagoi uzid kändmižid kodikelišpäi venäkel’he da vastkarin. Igähižiden vähäluguižiden rahvahiden keliden kehitoitand hilleneb, mi voib loptas neniden keliden kadomižel — nece om kaikid opakomb, sanub filologijan tedodoktor, professor Aleksandr Polikarpov — kändandan i praktikaližen lingvistikan kafedran pämez’ Pohjoižes (Arktižes) federaližes universitetas.
Uden programman abul tehtas enamba kodikeliden kändajid. Sen aigan vaumištadas Venäman rahvahiden keliden specialistoid, kudambad voiba ühtneda čomaliteraturan kändmižehe.
Programman tegii om Venäman Rahvahiden kodikeliden federaline institut, mitte radab ühtes Venäman Kändajiden ühtištusenke.
Tarkištele "Oma Median" MAX-kanalad!
