Ven’an prezidentan puoleh kohti: on työtty enämbi 1,6 miljounua kyzymysty
Talvikuun 19. päivänny pietäh Ven’an prezidentan oigei liinii. Sen aigah Vladimir Putin vastuau muan eläjien da toimittajien kyzymyksih. Vereksien tiedoloin mugah Ven’an eläjis on suadu enämbi 1, 6 miljounua kyzymysty eri viestindykanualoin kauti. Sih nähte kerdou RIA-Novosti -uudistoimisto.
— Talvikuun 16. päiväkse olijoin tiedoloin mugah muan eläjät soitettih 702 000 kerdua oigien liinien telefonkeskukseh, kerdou uudistoimisto.
TASS-uudistoimiston mugah suurin vuitti kyzymysty on työtty Moskovas, Piiteris, Krasnoduaran alovehelpäi sego Rostovan da Sverdlovskan kolkis.
Oigei liinii algavuu 12.00 čuasun aigah. Kyzymyksii voibi työndiä oigieh liinien loppuh suate.
Kyzymyksii otetah vastah telefonah 8–800–200–40–40 libo tekstuviestil da MMS-viestil telefonah 0–40–40. Ližäkse niidy otetah vastah moskva-putinu.ru -verkoportualan libo Max-viestisovelduksen kauti. Kyzymyksii voibi työndiä sežo sotsiualumedian kauti: VKontaktan da Odnoklassnikan avul.
Mennyt vuon Ven’an prezidentan oigieh liinieh työttih enämbän 2, 5 miljounua kyzymysty. Vladimir Putin vastai 80 kyzymykseh. Joukos oli kyzymyksii toimittajil da muan eläjilpäi. Kyzymykset koskiettih talovuttu, sotsiualutugie, opastustu, turvalližuttu da erillisty operatsiedu. Oigei liinii kesti enämbän nelliä čuassuu.
Vuvves 2001 Ven’an prezidentan oigei liinii on valmistettu 18 kerdua da suuri press-konferensii on pietty 16 kerdua.
Aihies voit lugie suomeksegi.
Yhty Oma Median Telegram-kanualah!
