Ven’a – perehien pereh: kanzoin yhtenäžyön vuozi algavuu
Kanzoin yhtenäžyön vuozi algavuu suurel Ven’a — perehien pereh -marafonal. Pivon vuoh tahtotah ozuttua Ven’an muan ainavoluaduvuttu, kuduas suat kanzat eletäh perehenny.
— Marafounas ezittyy valdivoherrua, Ven’an urhomiesty, kuulužua sportumiesty, kul’tuuran da taijon edustajua. Kučuttuloin luvendoloin pidäjien keskes ollah Ven’an prezidentan abuniekku, Ven’an voinu-histouriellizen seuran piälikkö, Ven’an kirjuttajien liiton piämies Vladimir Medinskii, Vaganovan nimellizen Ven’an balietan akadeemien rektoru, Ven’an kanzalline artistu Nikolai Tsiskaridze, Višnevskoin nimellizen kanzallizen meedikkututkimuskeskuksen johtai Amiran Revišvili, sportumiehet Artur Dalalojan, Jevgenija Medvedeva, Abdulrašid Sadulajev, Nursultan Mussagalejev, Ven’an urhot Baldan Tsidipov da L’udmila Bolilaja da toizet, ilmoittau kanzalline Ven’a-keskus omassah saital.
Marafonan aigah ozutetah dokumentufil’moi Altain, Ven’an pohjazen, Kamčatkan luondoh, kul’tuurah da histourieh nähte. Rubieu ruadamah kanzallizen literatuuran kirjasto, kus suau nähtä eri kanzoin tundiettuloin kirjuttajien tevoksii. Yhtenäžyön merkinny rodieu Horovod družbi -flešmob, kuduah yhtyy kymmenien kanzoin edustajua.
Pivon valmistajannu on Ven’an Znanije-seuru yhtes Ven’an tiijon da korgien opastuksen ministerstvan, Rosmolodez-laitoksen, kanzallizen Ven’a-keskuksen, Ven’an kanzoin taloin, Kanzallizien azieloin federuallizen agenstvan, Ven’an prezidentan tyves toimijan kanzallizien suhtehien nevvoston kel. Marafounan avajazih yhtyy Ven’an haldivon varapiämies Tatjana Golikova.
Pivon tarkoituksennu on Ven’al eläjien kanzoin yhtenäžyön, kanzoinvälizen sovun da ellendämizen lujoittamine. Sen vuoh korostetah, ku kul’tuurine da kielelline moniluaduvus hyövyttäy muan da se on edusijal geopoliittizien muutoksien aigah.
Aihies voit lugie vepsäkse da suomekse.
Yhty Oman Median kanualah Telegramas!
