Vehkoi-kyläh rodieu manasterin piha
Šoutjärven lohkon vepsäläzeh Vehkoi-kyläh Rastavan kirikön tyveh luajitah Novod’evičii-manasterin piha. Kirikön elavuttamizen da pihan luadimizen blahoslovi Moskovan da kogo Ven’an patriarhu Kirill.
— Elokuus myö Novod’evičii-manasterin muatušku Margaritan kel olimmo kyläs.
Kivikirikön seinillyö pagizimmo, kui kohendua sidä. Rastavan kirikkö on nostettu paikallizien eläjien varoih da pyhitetty vuvvennu 1914. Se kesti voinan, äijän vuottu seizoi hyllätynny da tyhjänny. Tuli aigu elavuttua se. Manasterin pihan luadimizen pluanat ollah suuret. Se rodieu suuri pyhilekävyjien keskus, kudai andau viriteksen kaiken tämän lohkon sotsiualu-kul’tuurizele da ekonoumizele kehityksele, kirjutti Karjalan piämies Artur Parfenčikov omassah VKontaktas.
15. ligakuugu A-215-juaman uvven tiepalan avajazis Karjalan piämies raportoičči Ven’an prezidentale Vladimir Putinale, ku tämä juamu on prezidentan käskyn mugah luajittavan Suuren Pohjazen Ven’an Tien tärgei kohtu, kudai yhtistäy Moskovan Novod’evičii-manasterin da Solovetskoin manasterin. Tämän turistu- da pyhilekävyjien matkan kaikis pitkevin pala menöy Karjalan tazavallan mualoi myöte.
Jo on allettu uvven objektan projektan luadimizen, kabrastamizen da rinnal olijan alovehen kunnostamizen ruavot.
