Vastused Ojatil: “Elonpu” udes ühtenzoiti erazvuiččid sugupol’vid
Piterin agjan Vidl-küläs mäni tradicionaline vepsläine ”Elonpu”-praznik. Necil vodel praznik oli omištadud Venäman rahvahiden ühtmuden vodele, sen tem oli ”Vasttused Ojatil!” Tradicijan mödhe praznik mäni Ojat’-jogen randal, se ühtenzoiti Piterin agjan eläjid, mastarid, vepsläižiden kundoiden ezitajid, sädaikollektivoid.
Praznikaha ühtni ”Periodika”-painišt-ki. Vepsän fol’klorkeskusele, školale i sijaližile kirjištoile oli anttud kirjoid, abukirjoid da “Kodima”-lehtesid, miččid paindas ”Periodikas”.
— Olin ihastusiš ühtneda praznikaha. Oli mel’he nähta, miše vepsläižed tradicijad eläba i ühtenzoitaba erazvuiččid sugupol’vid. Meiden ühthine tegend om kaita vepsläšt sanad, miše se kuluiži i andaižihe udele sugupol’vele, sanui Periodika”-painišton pämez’ Jevgenia Šustova.
Praznikal ezitiba erazvuiččed pajo-da kargkollektivad, niiden keskes oli ”Randaine”-fol’klorrgupp Petroskoišpäi. Sid’-žo radoiba möndrived da küliden tanhad, kus voi mujada vepsläšt emägust, ühtneda mastar’-klassoihe, väta rahvahan vändoihe, ostta mastariden käzil tehtud tehmusid: erazvuiččid čomitesid, tätüižid, lavahurstid, astjoid savespäi i äi tošt.
Praznikan aigan zavodihe vihm, no se ei telustand praznikale. Se jatksihe Vepsän fol’klorkeskuses.
Tarkištele "Oma Median" MAX-kanalad!
