Vastused Karjalan mal – Petroskoiš mäneb tradicionaline etnolager’
Petroskoiš mäneb ”Noriden vastuz Karjalan mal”-etnokul’turine lager’. Nece azjtego ühtenzoiti 25 vanhembad openikad, kudambad opendaba karjalan, vepsän da suomen keled. Nored oma tulnuded erazvuiččiš Karjalan rajonoišpäi, a mugažo Tverin agjaspäi.
— Lagerin popul’arižuz om lujas kaznu: täl vodel mö saim 50 pakičust. Etnolager’ ühtenzoiti lapsid Tverin agjan Lihoslavl’-lidnaspäi, Kalagespäi, Šoutjärvespäi, Segežaspäi, Padani-küläspäi da Petroskoišpäi. Lapsed oma tahtokahad da ozutaba mel’dütoitand, – starinoiči ”Oma Media” -portalale lagerin ohjandai Anna Gluškova.
Anna jonoštab, miše etnolagerin pätegendan om popul’arizoitta Karjalan igähižiden rahvahiden kelid openikoiden keskes, i sen ližaks – sündutada openikoiš tahtod jatkata keliden opendamišt.
Mastar’-klassoiden da openduzčasoiden aigan openikad tundištadase karjalaižiden, vepsläižiden da suomalaižiden kul’turanke i veroidenke. Lagerin ühtnikoiden täht Petroskoin universitetan baltianmeren suomalaižiden keliden kafedran opendajad vaumičeba lekcijoid interaktivižes formatas. Sen ližaks openikad kävuba ”Kiži”-muzejaha, Rahvahiden sebruden pertihe da mugažo karjalaižen pakaižukon Talviukkon ižandoičendaha.
Etnolager’ jatkub 23.-27. redukud. Azjtegon sädajad oma ”Rovesnik” -Karjalan ližaopendusen resurskeskuz, Karjalan valdkundan opendusen da sportan ministerstv da Karjalan valdkundan rahvahaližen da regionaližen politikan ministerstv.
Uzištoid neciš temas voib lugeda mugažo karjalaks, suomeks da venäks.
