Varvaran kirikkö, kudai on sijoitannuhes Tipinitsan kyläh, avatah restavroičusruadoloin jälles tänä kezän. Sit kerdoi Karjalan kul’tuuruobjektoin suojelun hallivon piälikkö Julija Alipova TASS -uudizien toimistole.
– Tänävuon riičitäh rakendustelat. Restavroičusruavot loppietah kezän allus, sanoi Julija Alipova.
Julija Alipovan sanoin mugah, piettih kyzely, kuduah yhtyi Oniegantagazen lohkon eläjii. Kyzelyn tuloksien mugah rahvas jo vuotetah kirikön avuandua.
Kirikön restavroičusruavot pandih rattahile vuvvennu 2015. Vuvves 2019 algajen ruadoloi pidäy Zaonežje-restavroičuskeskus.
Puuhine mustomerki, kudai nostettih vuozinnu 1653-1656, piätettih siirdiä Jandomjärvespäi Tipinitsan kyläh Hristosan taivahah astumizen kirikön sijah, kudai paloi vuvvennu 1980.
Varvaran kirikkö on valdivollizii objektoi da yksi vahnimis šatrukirikkölöis Oniegantagazen lohkol. Kirikkö kuuluu kul’tuuruperindöobjektoin joukkoh. Enne restavroičusruadoloi rakendus oli pahas kunnos.