Karjalaisien runojen vuuvven rajoissa Karjalan tašavallan kanšallisen ta alovehellisen politiikan ministerijö on ilmottan uuvven kilpailun “Piärunuo eččimäššä”. Ošallistuo šiih voit Karjalan jokahini eläjä, ketä innoššuttau karjalaini folklori.
– Jotta ošallistuo kilpailuh pitäy valmistua luova tevoš yhen runon peruštehella. Tevokšena voit olla vaikka mi ruato: ošallistuja voit piiruštua kuva, valmistua esityš, šoittua musiikkie, luatie kuva paperista, še voit olla käsityö, kirjutuš, valokuva, video, pakauttelu ta toisie muotoja, šelittäy KT:n kanšallisen ta alovehellisen politiikan ministerijön lehistöpalvelu.
Ošanottajien ikä ei ole rajotettu ta ruato šuau valmistua kuin yksin šekä joukošša. Järještäjät kyšytäh kilpailijie niise kertuo, mintäh juuri tämä runo oli valittu ruavon pohjakši.
Kilpailun tarkotukšena on luajentua tietoja karjalaisien henkilliseštä perinnöštä, šuaha lapšien ta nuorison kiinnoššušta alovehen folklorin tutkimiseh šekä kannattua luovien kykyjen kehittämistä.
Kilpailuruatoja šuau lähettyä kešäkuun 6. päiväh šuateh šähköpoštih.
Parahat ruavot ilmotetah Karjalaisien runojen päivänä 10. kešäkuuta. Niijen luatijat šuahah muistolahjat.
Lisyä tietuo löyvät Karjalaisien runojen vuuvven virallisešta VK-ryhmäštä.