V nature -kilvan voittajat on vallittu
Karjalan kanzalline muzei pidi jo kolmanden V nature -kilvan. Täl kerdua kilbah tuli ruaduo ven’an, karjalan da vepsän kielel. Kilbah on tulluh videoloi da fotokuvii Puudogas, Anukses, Segežas, Pitkäsrannas, Kondupohjas, Kostamukses, Kalevalas, Karhumäis, Oniegurannikon piiris da Petroskoispäi.
— Kaikis nuorimal kilbuniekal on vaiku kolme vuottu igiä, vahnimal — 74. Kaikkiedah kilbah tuli 66 kilburuaduo 46 ristikanzaspäi. Oli kilburuaduo karjalan da vepsän kielelgi, sanoi muzein ruadai Tatjana Dolonkinova.
Vepsänkielizet video-ruavot työttih Julija Lukonina Kalagespäi, häi saneli “Vepsän gorničan” säilyttämizes da Šoutjärven brihačču Nikita K’uršunov, kudai luadi videon, kui häi kalastau venehes Oniegujärvel. Vepsänkielizet ruavot suadih lahjat Periodika-julguamospäi muamankielen kehittämizes.
Kilvan voittajien joukkoh on piässyh Kotkatjärven eläi, karjalan kielen opastai L’udmila Blinkova. Hänen vedeo “Peldo perehty syöttäy” on suannuh voiton Yksi päivy vuvven syöttäy -nominatsies.
— Olemmo Kotkatjärves, tämä on minun kodoilu. Nygöi on syvysaigu, i on aigu kerätä kai, midä kazvoi meijän ogrodois. Tänäpäi minä sanelen teile, kui keräimmö da kui valličemmo kartohkua. Enne istutimmo kartohkat hevon avul, kaivoimmo hangol avul. Nygöi meile on pieni traktor-avvuttai, kudai avvuttau meile kai ruadua pellol teriämbi, rubei sanelemah L’udmila.
Tänä vuon V nature -kilbu oli luajittu Natural’noje hoz’aistvo -Kanzallizen muzein projektan hantuzis. Karjalan kanzalline muzei potakoiččou rahvastu tuliel aijalgi yhtymäh V nature -kilbah da työndämäh kilburuadoloi karjalan da vepsän kielel.
