Uziden vepsänkeližiden painusiden prezentacii mäni Šoutjärven muzejas
Šoutjärven vepsläižes etnografižes muzejas mäni vastuz lugijoidenke. Vastusele tuliba školan openikad opendajidenke, a mugažo ristitud, kelle om melentartušt vepsän kel’ da kul’tur. ”Periodikan” radnikad starinoičiba ”Kodima”-lehteses, ”Verez tullei”-al’manahas, ”Kipinä”-kulehteses lapsiden täht, vepsläižiš kirjutajiš da ezitiba uzid kirjoid vepsän kelel da vepsläižiden polhe.
―Pidab tehta mugoižid vastusid paksumba, siks ku konz mö vasttamoiš ühtes, mö tedištam toine toižes enamba. Naku, lugijad lehtesen saba, a ved’ heile om melentartušt, kut se tehtas, ken radab, ked oma avtorad, kuspäi hö oma. Nene vastused abutaba tedištada ut, sanub Šoutjärven muzejan pämez’ Natalja Anhimova.
Jäl’gmäižes seičemes vodes ”Periodika”-paindištos läksi eloho 16 kirjad. Lugijoil oli sur’ melentartuz’ mugoižihe painusihe, kut Ol’ga i Maria Mironovoiden "Sanu, luge, kirjuta!"-openduzkirjaha i Nina Zaicevan ”Minun vepsläine oza”-kirjaha.
