Uz’ ”Verez tullei”-al’manahan nomer jo ihastoitab ičeze lugijoid
”Periodika”-paindištos läksi uz’ ”Verez tullei”-al’manahan nomer vepsän kelel. Se starinoičeb tärktoiš azjoiš vepsläižiden elos, a mugažo tundištoitab lugijoid melentartuižidenke vepsän man ristituidenke, avaidab heiden peittud lahjavut.
— Läksi lujas čoma ”Verez tullei”-al’manahan nomer. Sen südäimišt-ki om ani hüvä. Mö andoim uzištoid, miččid mahtam arvostada, mahtam antta niile čomad da hüväd znamad, i ned tuleba istorijaha, sikš ku meiden al’manah om meiden kirjkelen istorii. Mö nägem, kut kirjkel’ sirdäse, kut mö kazvoim kirjutades runoid, prozad. Neciš nomeras mö avaižim ičeleze mugoižen suren nimen, kut Maksim Maksimov, tegim hänen nimed lähemba meile, vepsläižile. Olen ihastusiš, miše hän löuzi mugoižen elon palan, mitte hänele om mel’he i mitte kosketase vepsläižidenke, sanub al’manahan toimitai Nina Zaiceva.
Al’manahad čomenzoitaba Maksim Maksimovan kuvad, kus om kuvatud VII-XIX voz’sadoiden vanhveroižen uskondan kul’turan käzil kirjutadud kirjad da kalud hänen keradamištospäi.
”Verez tullei”-al’manahad voib ostta ”Periodikas”, sen arv om 130 rublad.
