Uz’ painuz: “Periodikas” om lähtnu uz’ etnografine kirj vepsläižiš
”Vepsläižiden kul’turjäl’gestuz” om oigetud vepsläižile da vepsän kul’turan oppijoile da navedijoile. Udehe kirjaha mülüba etnografižed da fol’klorižed materialad tetaban tedomehen, istorialižiden tedoiden doktoran Vladimir Pimenovan 1950.—1960.-voziden tedištuzmatkoišpäi. Material oli keratud Karjalan da Piterin agjoiden röuniš eläjil vepsläižil.
— Kirjas oma materialad Vladimir Pimenovan koumes tedištuzmatkaspäi. Sigä om otegid hänen päivkirjoišpäi, fotoid da pirdatusid. Lugijad voiba kuvitelda vepsläižiden elod mugoižen, miččen sen nägišti tedomez’, sanub üks’ kirjan keradajišpäi Zinaida Strogalščikova.
Toine keradai om Tamara Guzenkova — Vladimir Pimenovan ak, kudamb iče andoi äi materialad kirjan täht. Mugažo kirjaha ottud materialan pala kaitas Karjalan Rahvahaližen muzejan da Karjalan Tedokeskusen arhivoiš. Erasid materialoid om paindud ezmäižen kerdan. Mugažo kirjaha mülüba materialad Oloncan rajonan karjalaižiš.
Kirjan tiraž om 300 ekzempl’arad.
”Vepsläižiden kul’turjäl’gestuz” om paindud federaližen da valdkundaližen b’udžetoiden raha-abul.
