Uz’ ozuteluz Šoutjärves: Vepsän rahvahan horale – 90 vot!

Ozuteluz starinoičeb adivoile Vepsän rahvahan horas erazvuiččiden kaluiden da fotokuviden abul. 12+ Kuva: Galina Baburova

Šoutjärven vepsläižes etnografižes muzejas avaitihe uz’ ozuteluz. Nece om tehtud Vepsän rahvahan horan 90-voččeks jubilejaks. Ozuteluz starinoičeb adivoile horan polhe erazvuiččiden kaluiden da fotokuviden abul. Muzejan pämehen Natalja Anhimovan sanuiden mödhe, om ani tärged starinoita enamba horan pajanikoiš, sikš ku kaikutte heišpäi om erikoine, lahjakaz mez’. Ozutesikš, ningoine om horan pämez’ L’udmila Melentjeva, kudamb muga pit’kha eläb vepsläižiden keskes, miše jo iče lugeb ičtaze vepsän rahvahan ezitajaks. 

— Vepsläižile ozastui, miše mugoine ristit oli “oigetud” heidennoks. L’udmila mujab rahvahan kul’turan erigoičust, mujab nügüdläšt-ki aigad, tedab, kut pidab pajatada nügüd’. Hän iče meletab melodijoid äjile pajoile, starinoičeb Natalja.

Udel ozutelusel voib nägištada, miččed oliba horan ezmäižed sädod. Mugažo om vaumištadud kart, kus om znamoitud, kuna hor ajeli koncertoidenke neniš voziš. Ozutelusen tegijad ezitiba horan pajod erazvuiččiden kaluiden kal’t: ozutesikš, tetabiden kaikile haragaižen, kukoin da kanan figuroiden kal’t ühtennimižiš pajoišpäi. Eksponatoiden rindal om otegid pajoiden tekstoišpäi.

Vepsän rahvahan horan 90-voččele jubilejale omištadud ozuteluz radaškandeb voden 2027 keväz’kun lophusai.

Tarkištele "Oma Median" Telegram-kanalad!