Uz’ ozuteluz avaitihe S’andeman Uspenskijan naižmonastirin jubilejaks
Karjalan taidehmuzejan “Art-prospekt”-ozuteluzsijas avaitihe uz’ ozuteluz, miččel om pandud ezile S’andeman Uspenskijan naižmonastirin mal tehtud kuvid. Ozuteluz om omištadud monastirin 450-voččele jubilejale, miš tedotab Karjalan kul’turministerstvan press-služb.
S’andeman Uspenskijan naižmonastir’ om ani popul’arine sija erazvuiččiden ristituiden täht. Nece om hengižen tugen, lämän da südäinlämoin sija. Sinna paksus tuleskeleba taidehpirdajad, kudambad eciba hengenlibutandad.
Vodel 2024 monastirin male kuctihe professionaližid taidehpirdajid erazvuiččiš maišpäi — hö kaik openzihe Piterin Taidehakademijas I. J. Repinan nimel. Uden ozutelusel om pandud ezile sil aigal tehtud kuvid — ned oma čomid londuzkuvid, miččid tehtihe erazvuiččiš stiliš da taidehtehnikoiš.
— Ezmäižehe ozutelusen palaha mülüb Karjalan, Velikii Novgorodan, Viborgan, Vsevoložskan, Piterin tetabiden taidehpirdajiden kuvid. Toižehe palaha mülüb openikoiden kuvid: nored taidehpirdajad tuliba opendamhas Akademijaha Braziliaspäi, Afganistanaspäi, Makedoniaspäi, Argentinaspäi, Nikaraguaspäi, Mongoliaspäi, Latviaspäi, Efiopiaspäi, Kitaišpäi, Kongospäi. Ned kuvad oli lahjoitud monastirile — sijale, mitte tundištoiti verhanmaneläjid Venäman ortodoksižen kul’turanke, sanutas kul’turministerstvan press-relizas.
S’andeman Uspenskii naižmonastir’ sijadase Oloncan rajonas, läz S’andeba-järved. Nügüd’ monastirin mal om pen’ lidnaine, kus oma pühäkodid, časoun’ad da toižed sauvotused, kirjišt, leibänpaštam, adivpert’ i m. e. Naižmonastirin pämez’ om Varvara-igumenja (Ivanova).
Uz’ ozuteluz sädas S’andeman Uspenskijan naižmonastirin 450-voččeks jubilejaks, mitte praznuitas vodel 2027.
Tarkištele "Oma Median" MAX-kanalad!
