Uz’ openduzvoz’: Suomalaiž-ugrilaižes školas soiti ezmäine kelloine

Erine homaičuz ezmäižel openduzpäiväl om kingitadud lapsihe, kudambad tuliba školaha ezmäižen kerdan. Kuva: Galina Baburova

Kaikel Venämal zavodihe uz’ openduzvoz’. Erine homaičuz ezmäižel openduzpäiväl om kingitadud lapsihe, kudambad tuliba školaha ezmäižen kerdan. Täl vodel Petroskoin Suomalaiž-ugrilaine škol avaiži ičeze verajad 73 ezmäižen klassan openikan täht. Nel’l’ neniš lapsišpäi opendaškandeb školas vepsän kel’t.

— Nece om hüvä lugumär. Se tegihe jo tradicijaks: muloi mugažo nel’l’ openikad ezmäižes klassas opendaškanziba vepsän kel’t. Toivom, miše nece lugu ei vähene tulijal-ki vodel, sanui školan vepsän kelen opendai Nadežda Petrova.

Kaiked necil openduzvodel Suomalaiž-ugrilaižes školas opendase 960 last. 20 heišpäi opendab vepsän kel’t.