Uz’ “Kodima”: sügüz’ om tulnu!
Uz’ “Kodiman” nomer jo varastab ičeze lugijoid. Sügüz’ku toi vepsläižele mirule äi hüvid uzištoid. Ozutesikš, Lipeckas mäni “Parahim kodikelen da literaturan opendai” -konkursan ühthižvenälaine etap. Sigä parahimaks tegihe Gleb Fomin — vepsän kelen opendai Šokšun školaspäi. Nece om sur’ sabustuz kogonaižen Karjalan täht.
Hüvid uzištoid om Šoutjärves-ki: sigä jatktase tärktad töd — udištadas Apostolan da Evangelistan Matfejan vanh pühäkodi. Om jo sadud ezmäižed satused. A Kalages om zavodinus uz’ openduzvoz’: täl vodel ezmäine kelloine keloti 59 openikoiden täht.
Piterin agjas mäni IX Vähäluguižiden suomalaiž-ugrilaižiden da samojediden rahvahiden sädandradon ühthižvenälaine festival’ — “Pohjoiždölon melodijad”. Vepsän kul’turad sigä ezitiba Vepsän rahvahan hor Karjalaspäi da “Varasta”-ansambl’ Piterin agjaspäi.
— Neche nomeraha om pandud čomad materialad kahtes vepsläižes naižes, kudambil oma jubilejad täl vodel, — L’udmila Mosenzovas da Valentina Agafonovas. Om hüvä, miše “Kodima”-lehtesen abul mö voim tundištoitta lugijoid mugoižiden ristituidenke, sanui “Kodiman” pätoimitai Irina Sotnikova.
Sügüz’kun nomeras literaturan navedijad löudaba Oleg Mošnikovan da Nikolai Abramovan prozad da P’otr Vasiljevan sügüzlišt runotust.
Tarkištele "Oma Median" MAX-kanalad!
